22 август куни Қирғизистондан Ўзбекистонга экстрадиция қилинган журналист Бобомурод Абдуллаев муносиб хулқ-атвор қоидаларига риоя қилиши тўғрисидаги тилхатга асосан озод қилинди. Бу ҳақда Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов маълум қилди.
ДХХ матбуот хизмати Kun.uz’га тақдим қилган видеолавҳада Бобомурод Абдуллаев президент Шавкат Мирзиёевга мурожаат қилиб, миннатдорлик билдирган.
“Менинг онам сизга тақдиримдан хавотир олиб, мурожаат қилган экан. Шу онаизорнинг мурожаатини ерда қолдирмай кўриб чиқибсиз. Сиздан Аллоҳ рози бўлсин. Каттадан катта раҳмат, ҳурматли Шавкат Миромонович” деган журналист ўз мурожаатида.
Шунингдек, Бобомурод Абдуллаев Ўзбекистон президентининг инсонпарварлик йўналишида олиб бораётган сиёсати албатта ўз мевасини беришига ишонч билдирган ҳамда онасининг ва ўзининг мурожаатини инобатга олгани учун миннатдорлик билдирган.