16 июль куни соат 19:09 да 102 рақамига Сергели тумани Янги Чоштепа массиви қурилиш майдончасининг ёпиқ ҳудудида бир нечта эркаклар ўртасида жанжал юзага келгани ҳақида хабар келиб тушган. Бу ҳақида Тошкент шаҳар ИИББ матбуот хизмати хабар қилмоқда.
Воқеа жойига мазкур туман ИИО ФМБ ходимлари етиб келишган. Ички ишлар органлари ходимлари томонидан аниқланишича, жанжал 28 ёшли қашқадарёлик Ў.М. ва андижонлик 30 ёшли М.К.лар ўртасида, қурилиш асбоблари сабабли юзага келган.
Жанжалга бошқа ишчилар ҳам қўшилганлар. Ҳозирги вақтда уларнинг шахслари аниқланмоқда. Келишмовчилик натижасида ҳеч кимга тан жароҳатлари етмаган.
Шу билан бирга, ҳодиса тафсилотларини аниқлаш учун Сергели тумани ИИО ФМБ томонидан терговолди текшируви ўтказилмоқда. Текширув натижасига кўра ҳодиса иштирокчиларининг ҳатти-ҳаракатларига ҳуқуқий баҳо берилади. Ўз ўрнида қурилиш объекти ишчилари билан эса профилактик суҳбат ўтказилган.