Ижтимоий тармоқларда тарқалган «Коронавирусдан вафот этган беморнинг мурдаси 15 соат шифохонанинг ичида турди» мазмунидаги видеомурожаат Қашқадарё вилояти соғлиқни сақлаш бошқармаси томонидан ўрганилди.
Маълум бўлишича, мазкур видеомурожаат Ғузор тумани тиббиёт бирлашмаси хирургия бўлими (реанимация эмас) навбатчи ҳамшираси томонидан тарқатилган. Ушбу ҳамшира коронавирус инфекциясини юқтирган бемор реанимация бўлимига олиб келинганидан сўнг унга тиббий ёрдам кўрсатиш ва вафотидан кейин уни дафн этиш жараёнларига аралашмаган.
Бемор реанимация бўлимига оғир аҳволда «Тез тиббий ёрдам» машинасида олиб келинган. У ва яқинлари «Тез тиббий ёрдам» шифокорига Тошкент вилоятига бориб келишганини айтишмаган. Бемор қандли диабет касаллиги билан оғриганлигини маълум қилганлиги сабабли юқумли касалликлар шифохонасига эмас, зудлик билан реанимацион муолажа кўрсатиш мақсадида уни жонлантириш бўлимига келтирилган. Навбатчи шифокор томонидан инфекционист чақиртирилган. Мутахассислар COVID-19га гумон қилганлиги сабабли бемордан суртма олинган ва вилоят вирусология лабароториясига юборилган. Бемор дарҳол изоляция қилиниб, шифокор ва ҳамшира махсус ҳимоя кийимида даволаш жараёнига жалб этилган.
Мутахассислар томонидан кўрсатилган реанимацион муолажаларига қарамасдан бемор 2020 йил 30 июнь куни ўткир юрак қон-томир ва нафас етишмовчилигидан вафот этган. Ундан олинган суртма республика вирусология лабораториясида такрорий COVID-19 таҳлилидан ўтказилган ва мусбат натижа аниқланган.
Ўлим қайд этилганидан сўнг марҳум барча санитария қоидаларига тўлиқ риоя этилган ҳолда дафн этилган. У билан мулоқотда бўлганларнинг барчаси карантин назоратига олинган. Карантинга олинган фуқаролардан фақатгина бир нафар шифокор ва бир нафар ҳамшира бемор билан бирламчи мулоқотда бўлишган.
Белгиланган тартибларга асосан марҳумнинг жасадини дезинфекция қилинган ҳолда дафн этиш чоралари белгиланган. Махсус вирусологик лаборатория таҳлили чиққунича (табиийки, бу жараён маълум вақт талаб этади), дезинфекция ва дафн этиш тадбирлари ташкил этилгунига қадар жасад реанимация бўлими изоляция хонасида сақлаб турилган. Шундан сўнг марҳумнинг жасади вилоят санитария-эпидемиологик осойишталик маркази, вилоят фавқулодда вазиятлар бошқармаси ва Миллий гвардия ходимлари иштирокида «Тез ёрдам» махсус машинасида олиб борилиб, дафн этилган.
Марҳумни даволашда, жасадни дезинфекция қилишда, шифохонадан олиб чиқиб, дафн этишда ҳамшира ва шифокорлардан ҳеч ким иштирок этмаган.
Шунингдек, Қашқадарё вилояти соғлиқни сақлаш бошқармаси ахборот хизмати хабарида интернет саҳифаларида тарқалган видеоёзувда айтилган ижтимоий таъминот масаласидаги танқидий фикрлар инкор қилинади.
«Ғузор туман тиббиёт бирлашмасига қарашли карантиндаги тиббиёт ходимларига 30 июнь куни жами 45 миллион сўмлик тиббий буюмлар, ҳимоя кийимлари ва дори-дармон воситалари етказилган. Туман ҳокимлиги томонидан карантиндаги фуқароларни овқатлантириш учун 44,5 миллион сўм ажратилмоқда. Карантин ҳудудида барча зарурий шароитлар яратилган. Карантинда ишлайдиган тиббиёт ходимлари иш ҳақига қўшимча тарзда 6 фоизли рағбатлантириш тўловлари тўлаб берилади», дейилади хабарда.
Эслатиб ўтамиз, шу йилнинг 29 июнь куни узоқ вақт уй шароитида даволаниб келган Қашқадарё вилояти Ғузор туманида яшовчи 64 ёшли С.Ҳ. ўткир юрак қон-томир ва нафас етишмовчилигидан вафот этган эди.