ЎзА хабарига кўра, фуқаро ДХХ Андижон вилоят бошқармаси ходимлари томонидан ўтказилган тезкор тадбир давомида қўлга олинган.
Хўжаобод тумани “Мундуз” МФЙ ҳудудида “Андижон-Қорасув” йўналишида ҳаракатланиб кетаётган Раҳматилло Аҳмедов бошқарувидаги “Нексия-3” русумли автомобиль тўхтатилган.
Машина кўздан кечирилганда, унинг юкхонасига яшириб қўйилган 1 дона 30 литр ҳажмли елим идишда ва 2 дона целлофан пакетда жойланган жами 2 116 501 АҚШ доллари миқдоридаги хорижий валюта борлиги аниқланган.
Маълум бўлишича, Тошкент шаҳридан бериб юборилган ушбу пулларни Қорасув шаҳрида яшовчи Раҳматилло Аҳмедов Шаҳрихон туманида кутиб олган. Мазкур катта миқдордаги хорижий валюта божхона назоратини четлаб ўтиб, қўшни Қирғизистон Республикасига чиқарилиши керак бўлган.
Ҳозирда мазкур ҳолат юзасидан ДХХ Андижон вилоят бошқармаси томонидан жиноят кодексининг тегишли моддаларига асосан жиноят иши қўзғатилиб, ушбу ишга алоқадор шахсларни аниқлаш бўйича зарур чора-тадбирлар кўрилмоқда.