Миллий гвардия Қўриқлаш бош бошқармаси Матбуот хизматининг маълум қилишича, жорий йилнинг 12 март куни Чилонзор туманида жойлашган 200-мактаб директори ва инспектор-психологи томонидан мактаб ўқувчилари таҳлил қилинди. Унга кўра, сурункали равишда дарс қолдираётган ҳамда тартиб интизоми яхши бўлмаган ўқувчилардан бирининг отаси фуқаро М.Э. суҳбатга чақиртирилди.
Суҳбат мобайнида мактаб директори ва инспектор-психолог, фуқаро М.Э.га фарзандининг дарсга келмаётганининг сабабларини сўраб, дарсда ўзини тутиши ҳам ўзгариб қолганлиги тўғрисида маълумот берилиб, биргаликда шуғулланиш зарурлиги тушунтирилган. Фуқаро М.Э. эса ўғлининг хатти-ҳаракатларидан жаҳли чиқиб, мактаб маъмурияти билан ҳамкорликда ишлаш ўрнига аксинча уларга айбни ағдариб, жанжал кўтарган.
"Ташвиш" хабари асосида соат 10:17 атрофида етиб келган тезкор ҳаракатланувчи гуруҳ ходимлари томонидан фуқаро М.Э. туман ИИБга олиб борилган ва унга нисбатан МЖтКнинг 47-моддаси (болаларни тарбиялаш ва уларга таълим бериш борасидаги мажбуриятларни бажармаслик) бўйича баённома расмийлаштирилган.
