"Миллий тикланиш" ДП етакчиси, Олий Мажлис Қонунчилик палатаси спикери ўринбосари Алишер Қодиров рус тилининг таълим, телевидение ва бошқа соҳаларда қўлланилишини қайта кўриб чиқишни таклиф қилди.
"Расмий рус томони шовинистларни ғалати чиқишларини таъкидлашдан нарига ўтмаяпти. Бу уларни бундай риторикадан манфаатдор деган таассурот уйғотади. Сўнгги вақтларда рус тилида шовинистик баёнотлардан бошқа нарса эшитмаяпмиз.
Бу ҳолатда муносабатлар ўз йўлига, амалий чоралар ҳақида ўйлашимиз керак. Масалан, 3 фоизга ҳам бормайдиган рус ватандошлар учун таълим ва телевиденияда рус тили номутаносиб даражада кўп. Бу номутаносиблик тузатилиши керак.
Биринчидан, Ўзбекистонда бошланғич таълимни она тилида ўқитилиши бўйича норма қонунга киритилиши мумкин. Иккинчидан, қозоқ, озар, қирғиз, туркман, турк ва тожик қардошлар билан телекўрсатувлар алмашишни йўлга қўяйлик. Фракциянинг яқин мажлисларида бу масалаларни муҳокама қилмоқчимиз", - дея ёзади у.
Эслатиб ўтамиз, аввалроқ рус тарихчиси Михаил Смолин айрим халқларнинг шаклланиши ва Ўрта Осиё давлатларининг ташкил топиши ҳақида ўз фикрларини билдирган эди. Унинг фикрича, ўзбеклар СССРгача бўлмаган.
