Туркиянинг Бартин вилоятидаги Амасра шаҳрида конда портлаш юз берди. Ҳодиса натижасида, ҳозиргача 25 нафар кончи ҳалок бўлди. Бу ҳақда соғлиқни сақлаш вазири Фаҳреттин Кожага таяниб Associated Press маълум қилди.
Вазирнинг сўзларига кўра, 11 киши шифокорлар назоратида. Улардан 1 нафарининг аҳволи оғир, ярадорлардан 4 нафари реанимацияга ётқизилган. 6 нафар кончи тез ёрдам машинасида Истанбул шаҳар касалхонасининг куйиш марказига етказилди.
Маълумотларга кўра, воқеа Амасра ҳудудидаги кўмир конида 300 метр чуқурликда содир бўлган.
Туркиянинг табиий офатлар ва фавқулодда вазиятлар бошқармаси маълумотларига кўра, фавқулодда ҳолат сабаблари ҳали аниқланмоқда.
