Тошкент давлат техника университети ҳудудида замонавий ўқув-амалий комплекс барпо этилади.
Бу ҳақда Президент Шавкат Мирзиёевнинг 26 октябрь куни қурилиш соҳасидаги лойиҳалар тақдимотида маълум қилинди.
Тақдимотда дунё тажрибаси, хусусан, кўплаб машҳур илмий муассасалар университетлар ичида жойлашганлиги таъкидланди.
Режалаштирилаётган мажмуа ҳам шу ҳудуддаги Тошкент давлат техника университети, Ўзбекистон Миллий университети ҳамда Турин политехника университетидаги жами 36 минг талаба, 2 мингдан зиёд профессор-ўқитувчилар учун шундай марказ бўлиши кўзда тутилмоқда. Бу ерда бир пайтда 500 та стартап резидентлари, 120 та ишлаб чиқариш корхонасини жойлаштириш мумкин бўлади.
Президент ушбу лойиҳалар билан танишиб, уларни такомиллаштириш бўйича қатор кўрсатмалар берди.
