Қорақалпоғистон Республикасининг Соғлиқни сақлаш вазирлиги Матбуот хизматининг маълум қилишича, Отажон Каримович Ҳамроев ўз аризасига биноан лавозимидан озод қилинган.
Қайд этилишича, вазирнинг соғлиғида август ойида муаммолар пайдо бўлган ва унга бўйин умуртқа чуррасининг оғир ҳолати ташхиси қўйилган.
Отажон Ҳамроев вазирликнинг Telegram’даги расмий каналида ўзининг истеъфоси ҳақида ёзиб, жумладан, соҳадаги фидойи ва билимли тиббиёт ходимларининг хизматларини эътироф этади.
“Тизимдаги барча тиббиёт ходимларига, ушбу мураккаб ва ўта оғир вазиятда ўзини йўқотмасдан тиббий ёрдам кўрсатишда иштирок этган барча ҳамкасбларимизга ўз миннатдорчилигимни билдираман.
Aлбатта, бизнинг халқимиз орасида, шунингдек, биз доимо ёрқин хотиралар билан эслайдиган ҳамкасбларимиз орасида йўқотишлар бўлди. Жойлари жаннатда бўлсин ва яқинларига сабр берсин.
Мен ўз касбимни жуда яхши кўраман ва шу сабабли соғлиғим тикланиши биланоқ шифокорлик соҳамга қайтаман”, дейди тиббиёт фанлари доктори Отажан Ҳамроев.
Эслатиб ўтамиз, муқаддам Жўқорғи Кенгес раисининг ўринбосари сифатида фаолият юритган Отажон Ҳамроев 2020 йилнинг май ойида Қорақалпоғистон Соғлиқни сақлаш вазири этиб тайинланганди.
