Аввалроқ ижтимоий тармоқларда Самарқанд вилоятидаги мактабгача таълим муассасаси тарбиячилари сифатсиз кўмирдан брикет (таппи) тайёрлаётгани акс этган фото тарқалганди.
Мактабгача таълим вазирлиги ушбу хабарларга расмий муносабат билдирди.
Мактабгача таълим вазири ўринбосари Шодиёр Маматқулов қуйидагиларни маълум қилди:
— Ушбу ҳолат Самарқанд вилояти Тойлоқ туманидаги 30-сонли мактабгача таълим муассасасида бўлган. Ушбу муассасага 11 тонна кўмир келтирилган. Ана шу кўмирнинг 400-500 килограмми майдаланган, сифатсиз кўмир шаклида бўлган ва шу сабабли ходимлар томонидан шу ҳолатда тайёрланган.
Мактабгача таълим муассасаси директори кўмирни увол қилмаслик мақсадида ўз ихтиёрлари билан қўлбола брикетларни ясаганини айтган.
