Наманганда Lacetti ва ҳаракатланиб келаётган поезд иштирокида йўл-транспорт ҳодисаси содир бўлди. Натижада Lacetti’да бўлган йўловчилар вафот этган. Бу ҳақда Наманган вилояти ИИБ ЙҲХБ Aхборот хизмати хабар қилди.
Жорий йилнинг 25 ноябрь куни тахминан соат 18:30 да Наманган шаҳридаги 4N-434 маҳаллий Файзобод-Машад йўлининг 10-чақиримида Aндижондан ҳаракатланиб келаётган юк поезди ва Lacetti русумли автомашина тўқнашган. Натижада Lacetti’да бўлган ҳайдовчининг оила аъзолари воқеа жойида вафот этган.
Воқеа содир бўлган ҳудудда истиқомат қилувчи аҳоли айтишича, поезд йўли ёритиш чироқлари билан таъминланмаган. Керакли йўл белгилари ҳам ўрнатилмаган. Кесишувдаги мавжуд камчиликларни Наманган вилояти ИИБ ЙҲХБ бошлиғи Э. Ҳайдаров ҳам таъкидлаган. Шунингдек, мазкур темирйўл кесишуви қўриқланмайдиган ҳудуд бўлганини ҳам айтиб ўтган.
Ҳозирда мазкур ҳолат юзасидан Наманган вилояти ИИБ томонидан суриштирув ишлари амалга оширилмоқда.
