Ҳиндистон жанубидаги Андхра-Прадеш штати Элуру шаҳрида номаълум касаллик сабабли 315 киши шифохонага ётқизилди, бир киши вафот этди. Бу ҳақда The Hindu нашрига таяниб ТАСС хабар берди.
Шифохонага номаълум касаллик аломатлари билан ўтган шанба куни мурожаатлар бўлган. Якшанба куни кечга бориб, ушбу касалликдан азият чекаётганлар сони 315 тага етган. Улар орасида 46 нафар бола ва 70 нафар аёл борлиги маълум қилинган.
Шифокорлар беморларда бош айланиши, бош оғриғи ва тутқаноқ аломатлари кузатилаётганини билдиришди. Кўпчилик беморларнинг ахволи барқарор, коронавирусга қарши топширилган тестлар эса манфийни кўрсатган.
Нашрга кўра, экспертлар касаллик келиб чиқиши билан боғлиқ бир нечта тахминларни кўриб чиқмоқда. Улар орасида ҳаво ифлосланиши ёки сифатсиз озиқ-овқатлардан оммавий заҳарланиш натижасида келиб чиққан бўлиши мумкинлиги каби версиялар илгари сурилмоқда.
