Соғлиқни сақлаш тизимини такомиллаштиришда ёрдам бериш мақсадида Туркиядан бир гуруҳ экспертлар Ўзбекистонга келди.
Жами еттита мутахассис таклиф этилган: Ҳасан Чагил, Меҳмет Угурлу, Талган Кючук, Муҳаммад Ёрнек, Меҳмет Эрсой, Ҳасан Багжи ва Меҳмут Авжи. Улар бой халқаро тажриба ва малакага эга мутахассислардир.
Уларнинг ҳар бири тегишли йўналиш учун масъул этиб тайинланди:
• бирламчи тиббий-санитария ёрдамини такомиллаштириш;
• тиббий суғурта тизимини жорий этиш ва соҳани рақамлаштириш;
• шифохоналарда тиббий хизмат кўрсатиш самарадорлигини ошириш;
• тиббий хизматларни режалаштириш;
• фармацевтика тармоғини ривожлантириш ва дори воситалари билан таъминлаш;
• тиббий асбоб-ускуналардан фойдаланиш самарадорлигини ошириш;
• шошилинч ва тез тиббий ёрдамни ривожлантириш.
Айни пайтда улар жойларда бўлиб, соғлиқни сақлаш муассасалари фаолиятини атрофлича ўрганмоқда ва уни янада ривожлантириш бўйича ўз тавсияларини бермоқда.
Ушбу таҳлиллар натижалари, таклиф ва тавсиялар умумлаштирилиб, соғлиқни сақлаш тизимини босқичма-босқич ислоҳ қилиш бўйича қисқа, ўрта ва узоқ муддатли "йўл хариталари" ишлаб чиқилиши ва амалга оширилиши режалаштирилган.
