Аввалроқ, ижтимоий тармоқда бир йигит ИИО кийимни кийган ҳолда видео эълон қилгани кенг муҳокамаларга сабаб бўлди. Тошкент вилояти ИИББ Матбуот хизмати ҳолат юзасидан UzNews.uz'га маълумот берди.
Маълум қилинишича, мазкур видеони Чиноз тумани "Ёввош" МФЙда яшовчи Х.Д. олиб, ижтимоий тармоққа тарқатган. У туман ИИБ томонидан бўлимга чақиртирилиб, профилактик сухбат ўтказилган.
Мазкур йигитга нисбатан МЖтКнинг 209-1-моддаси (вазирликлар, идоралар ва ташкилотлар ходимларининг формали кийим-бошини қонунга хилоф равишда кийиб юриш) билан баённома расмийлаштирилган ва формали уст ва бош кийим олиб қўйилган.
Маълумот учун, мазкур модда билан айбланганлар формали кийим-бошни мусодара қилиниб, БҲМнинг 2 бараваридан 5 бараваригача жарима жазоси билан жазоланади.
