Маълум бўлишича, Миллий гвардия Жиззах вилояти бошқармасида муддатли ҳарбий хизматни ўтаб келаётган оддий аскар Т.О. жорий йилнинг 6 июнь куни тиббиёт бўлими фельдшерига ошқозонида оғриқ борлиги билан мурожаат қилган.
7 июнь куни Самарқанд ҳарбий госпиталига олиб бориб, тиббий кўрикдан ўтказилган. Натижада мутахассис-терапевт врачнинг "Сурункали гастродуоденит қўзиш даври" ташхиси билан терапия бўлимига стационар даволаниш учун ётқизилган.
Бироқ жорий йилнинг 15 июнь куни соат 14:00 атрофида муддатли ҳарбий хизматчи Т.О.нинг соғлиғи ёмонлашиб, Самарқанд ҳарбий госпиталида вафот этган.
Ўтказилган суд-тиббий экспертиза хулосасига кўра Т.О.да «Ўткир юрак қон-томир етишмовчилиги» сабабли тўсатдан ўлим ҳолати қайд этилган.
Ҳозирда мазкур ҳолат бўйича Самарқанд вилояти Ҳарбий прокуратураси томонидан терговга қадар текширув ишлари олиб борилмоқда.
