ЎФА Этика қўмитасининг навбатдаги йиғилишида ЎФА ҳаками О. Тўйчибоев бўйича аниқланган коррупцион ҳолатлар кўриб чиқилди.
Қўмита томонидан О. Тўйчибоев ЎФА интизом кодексининг 5.44-бандига асосан бир қатор футбол учрашувларида учрашувга ёки унинг натижасига таъсир ўтказиш мақсадида келишувларда қатнашгани учун 1 йил муддатга футбол билан боғлиқ ҳар қандай фаолиятдан четлаштириш хусусидаги қарор қабул қилинди.
Аниқланган ҳолатларда “Динамо” ПФК вакилларининг иштироки ҳам аниқланиб, уларга нисбатан тегишли жазо чоралари қўлланилди.
Шунингдек, мазкур йиғилиш қарори билан Бухоро вилояти 2-лига иштирокчиси “Олот Истиқлол” футболчиси Н. Хасанов “Бухоро-W” аёллар футбол клуби вакилларининг кўрсатмаларига асосан уларни ҳақ эвазига тотализаторда иштирок этишга ундагани учун ЎФА интизом кодексининг 5.44, 5.53 ва 5.60-бандларига асосан бир йил муддатга футбол билан боғлиқ ҳар қандай фаолиятдан четлаштирилди.
Жорий йил январида ФИФA ва ОФК ҳаками Ш. Қосимов 3 йил муддатга футбол билан боғлиқ ҳар қандай фаолиятдан четлаштирилганди.
Ундан аввал ўзбекистонлик уч нафар ҳакам ҳам коррупция сабаб футболдан четлатилганди.
