Ўзбекистонда ЯИМнинг қарийб ярми давлат иштирокидаги корхоналар ҳиссасига тўғри келади.
Бу ҳақда Давлат активларини бошқариш агентлиги Ахборот хизмати раҳбари Мўмин Ибодов АОКА бўлиб ўтган брифингда маълум қилди.
Агентлик вакилининг маълум қилишича, республикада 2,8 мингта давлат иштирокидаги корхона мавжуд. Мамлакат ялпи ички маҳсулотининг қарийб ярми айнан шу корхоналар ҳиссасига тўғри келади.
– Корхоналарни бошқаришда давлат яхши менежер ҳисобланмайди. Ушбу корхоналарнинг кўпчилиги самарасиз фаолият кўрсатади, улар давлат учун қўшимча юк бўлади ҳамда уларга берилган тариф, солиқ ва бошқа имтиёзлар сабабли ушбу соҳадаги рақобат муҳитига салбий таъсир кўрсатади, - дейди Мўмин Ибодов.
Бугунги кунда баҳоланган қийматда савдога чиқарилган 231 та объект сотилмай қолмоқда. Уларнинг 71 таси 6 ойдан буён, 47 таси эса, 1 йилдан ортиқ муддатда савдода турибди.
