Икки йиллик чекловлардан сўнг, қатор давлатлар томонидан поезд йўловчилари учун давлат чегараларини босқичма-босқич очиш борасида саъй-ҳаракатлар амалга оширилиши бошланган, дея хабар берди "Ўзбекистон темир йўллари" АЖ Ахборот хизмати.
Хабарда айтилишича, биринчи халқаро йўловчи поезди жорий йилнинг 1 апрель кунидан бошлаб Нукус – Бейнеу – Нукус йўналиши бўйича қатнай бошлайди.
"Ўзбекистон темир йўллари" АЖ ва "Қазақстан темир жолы" МК AЖ билан келишилган ҳолда жорий йилда Қозоғистонга яна бир йўловчи поезд ҳаракати ташкил этилмоқда.
2022 йил 2 майдан бошлаб ҳафтада уч маротаба Олма-ота-2 – Тошкент – Олма-ота-2 йўналишида 1/2-сонли поезд қатнови йўлга қўйилади. Ушбу поезд "Тошкент-Марказий" вокзалидан ҳар сешанба, пайшанба ва якшанба кунлари жадвал асосида Қозоғистонга жўнаб кетади. Ўзбекистон томон эса, "Олма-ота-2" темир йўл вокзалидан ҳар душанба, чоршанба ва шанба кунлари қатнайди.
Бошқа қўшни давлатлар билан темир йўл йўналишларининг қайта тикланиши томонларнинг келишувига асосан босқичма босқич очилиши кутилмоқда.
Чипталарни электрон тарзда ҳамда темир йўл кассаларида сотиб олиш мумкин.
