Президент Шавкат Мирзиёев 27 июнь куни видеоселектор йиғилишини ўтказди. Йиғилишда туман ва вилоят раҳбарлари, тегишли вазирлик ва идоралар раҳбарлари ва хўжалик бирлашмалари раҳбарлари иштирок этди.
Маҳаллий маҳсулотларнинг ташқи бозордаги ривожланиш ҳолати йиғилишнинг асосий мавзуси бўлди.
Йиғилиш давомида Президент бир қанча раҳбарларда масъулият, талабчанлик ва ташаббускорлик етишмаётганини қаттиқ танқид қилди.
“Ўзбекозиқовқатхолдинг” компанияси ва "Ўзагроэкспорт" АЖ раҳбарлари эгаллаб турган лавозимларига нолойиқ деб топилди.
"Ўзқурилишматериаллари" компанияси, "Ўзбекенгилсаноат" акциядорлик жамияти, "Ўзбекчармпойабзали" уюшмаси раҳбарларига “ҳайфсан” эълон қилинди.
Ўзбекистон Республикаси Бош вазири ўринбосари Улуғбек Розуқулов ва ташқи савдо вазири Элёр Ғаниевга мавжуд камчиликлари кўрсатиб ўтилди ва уларни бартараф этиш бўйича аниқ топшириқлар берилди.
Шунингдек, етиштирилган мева-сабзавот маҳсулотларини экспорт қилишни ташкил этиш масаласида сусткашликка йўл қўйган Тошкент, Жиззах ва Андижон вилоятлари, шунингдек, қатор туманлар ҳокимликлари раҳбарлари жиддий огоҳлантирилди.
