Жумладан, кеча 22 февраль куни соат тахминан 14:00да “UzNews.uz” мухбири Тошкент шаҳар ҳокимияти маъмурий биноси жойлашган ҳудуд олдида бир неча нафар ЙҲХБ ходимлари томонидан Epica автомашинасининг давлат рақами ечиб олингани гувоҳи бўлди.
Албатта, бу кўплаб пойтахтлик ва пойтахт меҳмонлари билан ҳам юзага келган ва юзага келиши мумкин бўлган ҳолатдир.
Ҳайдовчилар шуни аниқ билиб олишлари керакки, автомашина давлат рақами фақатгина техник кўрик давомида ЙҲХББ органлари томонидан носоз деб топилган, шунингдек, техник кўрикдан ўтмаган ёки тегишли рухсатномасиз қайта жиҳозлантирилган транспорт воситаларидан давлат рақам белгилари ечиб олиниши мумкин.
Ички ишлар вазирининг буйруғига асосан Транспорт воситаларидан давлат рақам белгиларини ечиб олиш тўғрисидаги низом тасдиқланган бўлиб, Низомга асосан, ЙҲХББ ходимлари автотранспорт воситаси техник кўрикдан ўтмаган ёки тегишли рухсатномасиз қайта жиҳозланган ҳолатлардагина автотранспорт воситасидан давлат рақам белгиларини ечиб олишлари ҳам мумкин.
Қолган барча ҳолатларда ЙҲХБ ходимларининг сизга тегишли бўлган автомашиналардан давлат рақамини ечиб олишга ҳуқуқлари йўқ.
