Медведев Ўзбекистонга бўладиган расмий ташрифи доирасида давлатимиз раҳбари Шавкат Мирзиёев билан кўришиб, МДҲ давлатлари ҳукумат раҳбарлари кенгашининг йиғилишида иштирок этади. Бу ҳақда Россия Федерацияси ҳукумати сайти хабар бермоқда.
Ўзбекистон Бош вазири Абдулла Арипов билан ўтказиладиган музокаралар 2 ноябрга режалаштирилган. Кутилаётганидек томонлар учрашув давомида икки томонлама ҳамкорликнинг долзарб масалаларини, жумладан, савдо-иқтисодий, сармоявий, энергетика, саноат ва қишлоқ хўжалиги соҳаларида ҳамкорликни янада кенгайтириш, йирик қўшма инфратузилма ва юқори технологияли лойиҳаларни амалга оширишни кўриб чиқадилар.
Музокаралар якунида имзолаш учун бир қатор корпоратив, идоралараро ва ҳукуматлараро ҳужжатлар тайёрланмоқда.
3 ноябрь куни Тошкентда Медведев Мустақил Давлатлар Ҳамдўстлиги ҳукумат раҳбарлари кенгашининг мажлисида иштирок этади.
