Аввалроқ, Тошкентда ЙҲХ ходимларининг қонуний талабига бўйсунмай қочишга уринган Malibu’ни тўхтатишда ўқотар қурол фойдаланилгани ҳақида хабар бергандик.
Воқеа жойидаги ЙПХ инспектори ва автомашина ҳайдовчиси воқеа ҳақида гапириб берди.
“Юнусобод тумани Янгишаҳар кўчасида йўлнинг қарама-қарши томонидан давлат рақами бўлмаган Malibu катта тезлик билан ҳаракатланиб келаётган пайтида йўлнинг ўртасига чиқиб, тўхтатиш мақсадида диққат ишорасини бердим. Диққат ишорага бўйсунмасдан ҳаракатлангани, фуқаролар ҳаётига хавф солгани ва ходимларнинг қонуний талабларига бўйсунмагани сабабли ИИВ меъёрий буйруқ ва талабларига асосан қурол қўлладим”, - деди ЙПХ инспектори Элшод Раҳматов.
Ҳужжатлар ўрганилганида ушбу фуқаро 2006 йилда ҳам ЖКнинг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 1-қисмида кўрсатилган жиноятни содир этгани аниқланган.
“Билдирсойга бордим. Ўша ерда ароқ ичдим. Тўрт кун турдим, бешинчи куни бу ер қимматлик қиларкан, деб ҳисоб-китоб қилмоқчи бўлдим. Ёнимдаги пул етмасди, Тошкентга дўконимдан пул олиш мақсадида келгандим. Тўғри уйимга келдим. Ходимларнинг тўхтатишига қарамасдан, қонуний талабларига бўйсунмадим. Қилган ишларимдан афсусдаман, айб менда, бўйнимга оламан. Ароқ ичибман, пиво ичибман, кейин ‘вообще’ ўчиб қолибман”, - деган Malibu ҳайдовчиси.
Ҳолат юзасидан ЖКнинг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
