Жорий йилнинг 9 декабрь куни "Қўйлиқ" деҳқон бозори янги қурилган Food City деҳқон бозорига кўчирилаётганлиги сабабли, фуқаролар "Қўйлиқ" улгуржи савдо бозори яқинидаги йўлнинг қатнов қисмини тўсиб, ҳаракатланаётган автомобилларни ўтказмаётгани акс этган видеолавҳа ижтимоий тармоқда тарқалди.
Шундан сўнг, Тошкент шаҳар ИИББ Ахборот хизмати UzNews.uz'га йўлни тўсганлар жазоланганини маълум қилди.
Қайд этилишича, уларнинг 5 нафарига МЖтКнинг 195 (ички ишлар органлари ходимларининг ўз хизмат бурчларини бажаришларига қаршилик кўрсатиш) ва 201-моддаси (йиғилишлар, митинглар, кўча юришлари ёки намойишлар уюштириш, ўтказиш тартибини бузиш)га кўра 5-7 сутка мамурий қамоқ жазоси тайинланди.
