Бугун юртимизга Волгабўйи ҳудудидан навбатдаги нам ва нисбатан совуқ ҳаво оқимлари кириб келди. Айрим жойларга кучсиз ёмғир ёғди. Фақат Қорақалпоғистон ва Хоразм вилоятидагина ёғингарчиликсиз об-ҳаво кузатилди. Кундузги ҳарорат 17-19 даражагача, жанубда эса 25 даражагача пасайди.
Ҳафтанинг бошидаги бундай совуқ ҳаво узоқ давом этмайди. Эртага Ўзбекистоннинг каттагина қисмида об-ҳаво ёғингарчиликсиз бўлади, фақат Фарғона водийси вилоятларида кечаси ва куннинг биринчи ярмида булутли об-ҳаво сақланиб туради, айрим жойларга ёмғир ёғади.
Яқин кунларда кечаси совуқ бўлиб, тунги ҳарорат 8-11 даражагача пасаяди. Ҳафта ўртасига келиб эса кундузги ҳаво ҳарорати 23-28 даражагача илийди.
Кейинчалик ҳафтанинг охиригача ёғингарчиликсиз об-ҳаво бўлиши кутилмоқда. Ҳарорат кўрсаткичлари ўртача кечаси 10-15, кундузи 25-30 даража бўлади.
