ДХХ ходимлари томонидан “Наманган – Косонсой” йўналишида ҳаракатланган 40 ёшли Н.В. бошқарувидаги “Каптива” русумли автомашина “Гурмирон” МФЙ ҳудудида тўхтатилиб, кўздан кечирилганида унинг салон қисмида 605 минг 136 АҚШ доллари борлиги маълум бўлган, деб ёзмоқда ЎзА.
Аниқланишича, муқаддам судланган Н.В. Тошкент шаҳри ва Наманган вилоятида истиқомат қилувчи фуқаролардан олган ушбу хорижий валюталарни маълум миқдордаги фоиз ҳисобида ҳақ олиш эвазига Косонсой туманидаги айланма йўллар орқали божхона назоратини четлаб ўтиб, Қирғизистонда яшовчи шахсга етказиб бериши керак бўлган.
Ҳозирда мазкур ҳолат юзасидан ДХХ Наманган вилояти бошқармаси томонидан Жиноят Кодексининг тегишли моддасига мувофиқ жиноят иши қўзғатилиб, ушбу ишга алоқадор бошқа шахсларни аниқлаш бўйича ҳам зарур чора-тадбирлар кўрилмоқда.
