Синоптиклар хабарига кўра, дам олиш кунлари Ўзбекистонда булутли ҳаво сақланиб қолади. Шимолий ҳудудлардан ташқари, кўплаб жойларда қор кўринишидаги ёғингарчилик бўлади. Ҳаво ҳарорати сезиларли даражада ўзгармайди.
Душанбадан бошлаб ёғингарчилик тўхташи кутилмоқда, аммо совуқ ҳарорат ҳафта ўрталаригача сақланиб туради. Тунги ва кечки пайт ҳарорат -3...-8 даражагача тушиб, кундузи 0...+5 даража бўлади.
Ўзгидромет жаҳоннинг етакчи об-ҳаво марказлари маълумотларига таяниб бераётган баҳоларига кўра, декабрь ойи ўртача нам ва ҳарорат бўйича меъёрларга яқин бўлади. Ой давомида ҳарорат кечаси +2...+7 даражадан 0...-5 даражагача, кундузи +10...+15 даражадан 0...+5 даражагача бўлади.
“Одатда Ўзбекистонда қиш фасллари қисқа ва кам қорли бўлади. Бу ерда қиш фаслининг ўзига хос хусусияти — ҳароратнинг кескин ўзгариб туришида. Бунда иссиқ ҳаво тўлқинлари совуқ ҳаво билан алмашиб туради. Ҳарорат совуқ бўлганда ёққан қор ҳаво илиши билан эриб кетгани сабабли, барқарор қор қоплами ҳосил бўлмайди“, - дейилади хабарда.
Ўзгидрометнинг эслатиб ўтишича, охирги йилларда энг совуқ қиш фасли 2007-2008 йилларда қайд этилган. У декабрь ойининг охиридан февраль ойининг ўрталарига қадар давом этган эди.
