Бош прокуратуранинг жамоатчилик билан алоқалар ва ҳуқуқий ахборот бўлими бошлиғи Ҳаёт Шамсутдиновнинг хабар беришича, Хоразм вилоятининг Шовот каналидан ичида эркак кишининг жасади бўлган Tico автомобили чиқариб олинган.
Аниқланишича, 17 апрель куни Хазорасп туман прокуратураси томонидан фуқаро Т.К. бедарак йўқолганлиги ҳолати юзасидан ЖКнинг 97-моддаси 1-қисми билан жиноят иши қўзғатилган.
Текширув натижасида Шовот каналидан Tico автомобили топилган, унда занжир билан автомобиль рулига боғлаб қўйилган 34 ёшли Т.К.нинг жасади бўлган.
Ҳозирда Т.К.нинг ўлим сабабларини аниқлаш бўйича суд-тиббий экспертизаси тайинланган. Тергов ҳаракатлари олиб борилмоқда.
