Соғлиқни сақлаш вазирлигининг хабарига кўра, Жиззах вилоятида 70 ёшли Ф.О. 20 июнь куни коронавирусга гумон қилиниб, карантинга олинган ва 23 июнь куни юқумли касалликлар шифохонаси реанимация бўлимига ётқизилган.
Унга «Юрак ишемик касаллиги, стенокардия, сурункали бронхит ва сурункали юрак етишмовчилиги, бўйин умуртқалари остеохондрози» ташхиси қўйилган.
Қайд этилишича, бемор охирги 10 йил давомида юрак ишемик касаллиги, стенокардия, бўйин умуртқалари остеохондрози ташхиси билан даволаниб келган.
Бемор шифокорлар назоратида бўлган. Сўнгги кунларда нафас, юрак ва ўпка етишмовчилиги сабабли аҳволи кескин оғирлашиб, реанимация бўлимига олинган.
Бемор мутахассисларнинг стандартлар асосида ўтказган муолажаларига қарамасдан, ўткир миокард инфаркти, ўткир юрак-қон томир ва нафас етишмовчилигидан вафот этган.
