Ўзгидромет хабарига кўра, бугун ва эртага республика бўйича об-ҳаво вақти-вақти билан ўзгариб туради, ёғингарчилик бўлмайди. Фақат Тошкент, Андижон, Наманган ва Фарғона вилоятларида айрим жойларда қисқа муддатли ёмғир ёғиши, момақалдироқ бўлиши мумкин.
Шарқий Қозоғистондан кираётган салқин ҳаво оқими Ўзбекистонда кундузги ҳароратнинг пасайишига олиб келди. Бугун ва эртага кундузи ҳаво ҳарорати +32…+35, шимол, жануб ва чўл зонасида +37…+39 даражани ташкил қилади.
Тунги ҳарорат +19…+24 даража атрофида сақланиб қолади. Айрим жойларда шамолнинг тезлиги секундига 15-20 метргача кучайиши мумкин.
Якшанба куни Ўзбекистоннинг текислик ҳудудида об-ҳаво қуруқ ва очиқ бўлади, фақат республиканинг тоғли туманларида айрим жойларда қисқа муддатли ёмғир ёғиши, момақалдироқ бўлиши мумкин.
Нисбатан салқин ҳаво оқими таъсири якшанба куни ҳам сақланиб туради. Ҳаво ҳарорати кечаси +19…+24, кундузи +32…+37 даража бўлади. Мамлакат жануби ва чўл зонасида ҳарорат 39 даражагача исийди.
