Жиззахда фуқаро 3 килограмм 245 грамм “симоб” моддасини сотаётган вақтида ҳуқуқни муҳофаза қилувчи органлар ходимлари томонидан қўлга олинди.
Маълум қилинишича, Жиззах вилояти божхона бошқармаси Контрабандага қарши курашиш ва божхона аудити бўлими ходимлари Давлат хавфсизлиги хизмати вакиллари билан ҳамкорликда юқори даражада хавфли ҳисобланувчи “симоб” моддасининг ноқонуний айланмасига қарши тезкор тадбир ўтказишди.
Тадбир давомида фуқаро А.Б. ўзига тегишли бўлган 3 килограмм 245 грамм “симоб” моддасини 17 500 АҚШ долларига сотаётган вақтида тадбир иштирокчилари томонидан қўлга олинди.
Ҳозирда мазкур ҳолат юзасидан божхона органлари томонидан суриштирув ишлари олиб борилмоқда.
Маълумот учун, Давлат стандартига мувофиқ симоб ва симобли бирикмалар хавфли бўлган 8 тоифадаги юкларга киради. Айниқса, симобнинг очиқ ҳолда буғланиб ҳавода тарқалиши инсон соғлиғига жиддий зарар етказиши мумкин.
