Истеъмолчилар ҳуқуқларини ҳимоя қилиш агентлиги матбуот хизмати хабарига кўра Sergeli-Avtotexxizmat МЧЖ мижозга нуқсонли автомобиль сотиб, уни алмаштириб бермасдан истеъмолчини айбдор қилган.
Истеъмолчилар ҳуқуқларини ҳимоя қилиш агентлигининг “Call Center” орқали тушган мурожаатга кўра, мижоз сотиб олган Lacetti автомобилида қисқа муддат ичида нуқсонлар пайдо бўлган.
Истеъмолчи З.А. харид қилган машинанинг ҳар еридан лак бўёқлари кўчиб туша бошлаган. Аввал том қисми, олди копоти, кейинчалик бошқа устки қисмларида ҳам шундай бўлди. Бу машина худди 30-40 йил хизмат қилгандек ҳолатга келиб қолган.
Автосалон эса жиддий нуқсонга эга бўлган Lacetti’ни кафолат муддатида янгисига алмаштириб бермаган. Аксинча, автомашинани ювиш жараёнида бўёғига шикаст етказган, деган баҳонани кўрсатди. Аммо истеъмолчи автомашинасини эҳтиётлаб, нуқсонлар келиб чиқмаслиги учун ўз вақтида унга қараб турган.
Агентлик шундан сўнг “Uzauto Motors” АЖ ҳамда Sergeli-Avtotexxizmat МЧЖларга тегишли сўров хатлари юбориб, уларни жалб этган ҳолда Ўзбекистон Республикаси “Истеъмолчиларнинг ҳуқуқларини ҳимоя қилиш тўғрисида”ги Қонуни ҳамда Ўзбекистон Республикаси Вазирлар Маҳкамасининг 2003 йил 13 февралдаги “Ўзбекистон Республикасида Чакана савдо қоидаларини ҳамда Ўзбекистон Республикасида умумий овқатланиш маҳсулотларини (хизматларини) ишлаб чиқариш ва сотиш қоидаларини тасдиқлаш тўғрисида”ги 75-сонли қарори талабларидан келиб чиққан ҳолда ўрганган.
Ўрганиш давомида, масала ойдинлашди ва “Sergeli-Avtotexxizmat” МЧЖ ўртасида 2019 йил 23 сентябрда тузилган шартномага асосан нуқсонли автомобиль 2020 йил 18 август куни худди шундай янги “Lasetti L-Elegant/AT Plus” автомобилга (2020 йил 19 август ҳолатига 138 126 000 сўм) алмаштирилди ҳамда қайтадан расмийлаштириб берилди, дейилади агентлик хабарида.
