20 июль куни Ўзбекистонда кузатилган аномал иссиқ ҳаво шароитида электр энергияси истеъмоли ва ишлаб чиқариш бўйича янги тарихий рекордлар қайд этилди. Бу ҳақда Энергетика вазирлиги маълум қилди.
Маълум қилинишича, суткалик электр энергияси истеъмоли 301,9 млн кВт·соатни ташкил этди. Бу ўтган ёзги мавсумдаги энг юқори кўрсаткичдан 29,3 млн кВт·соат (10,75%), 18 июль куни қайд этилган сўнгги рекорддан эса **7,5 млн кВт·соат (2,55%)**га юқори бўлди.
Шу куни ягона энергетика тизимида кундузги энг юқори юклама соат 17:22 да қайд этилиб, максимал қувват 14,2 ГВтга етди.
Суткалик электр энергияси ишлаб чиқариш ҳажми ҳам янги рекорд ўрнатиб, 305,4 млн кВт·соатни ташкил қилди. Бу 18 июль куниги 297,1 млн кВт·соатлик кўрсаткичдан **8,3 млн кВт·соат (2,79%)**га юқори бўлди.
Вазирликнинг таъкидлашича, юқори кўрсаткичлар аномал иссиқ кунларда электр энергиясига талаб кескин ошганини кўрсатади. Шунга қарамай, истеъмолчиларни узлуксиз электр энергияси билан таъминлаш учун энергетика тизими барқарор ишлаган.
Шу билан бирга, юқори юклама сабаб айрим ҳудудларда маҳаллий электр тармоқларида носозликлар юзага келди. Хусусан, Тошкент шаҳрининг Олмазор, Яккасарой, Чилонзор, Яшнобод ва Сергели туманларидаги электр тармоқларида авариявий ҳолатлар кузатилиб, минглаб истеъмолчилар вақтинча электр таъминотисиз қолган.
Вазирлик маълумотига кўра, авария-таъмирлаш бригадалари кучайтирилган тартибда иш олиб борган ва барча носозликлар қисқа вақт ичида бартараф этилиб, электр таъминоти тўлиқ тикланган.
Комментарии