Тошкент шаҳрида халқаро университетлар шаҳарчасини ташкил этиш режалаштирилмоқда. Унда етакчи хорижий ва маҳаллий олий таълим муассасалари жойлаштирилади. Бу ҳақда президент матбуот хизмати хабар қилди.
Маълум қилинишича, Шавкат Мирзиёев етакчи хорижий университетлар билан академик ҳамкорликни кенгайтиришга оид таклифлар тақдимоти билан танишган.
Лойиҳани амалга оширишда Қатардаги Education City, Бирлашган Араб Амирликларидаги Дубай халқаро академик шаҳри ҳамда Жанубий Кореянинг Инчхон глобал кампуси тажрибасидан фойдаланиш таклиф этилган.
Университет шаҳарчасига нуфузли хорижий олийгоҳлар филиалларини жалб этиш, замонавий ўқув кампуслари ва талабалар турар жойларини қуриш, лицензиялаш талабларини соддалаштириш, грант ва стипендиялар ажратиш, божхона ҳамда солиқ имтиёзларини бериш, шунингдек, роялти тўловларининг бир қисмини қоплаб бериш кўзда тутилмоқда.
Президентнинг таъкидлашича, мазкур чора-тадбирлардан асосий мақсад Ўзбекистонни халқаро таълим дастурлари ва стандартлари кенг жорий этилган, минтақанинг етакчи таълим марказларидан бирига айлантиришдан иборат.
Комментарии