Сариосиё тумани ҳокимлиги матбуот хизмати маълум қилишича, 21 июнь куни соат 20:30–20:45 оралиғида тоғли ҳудудларда кузатилган кучли ёғингарчилик натижасида Обизаранг дарёсида сув сатҳи кескин кўтарилиб, сел оқими юзага келган.
Оқибатда «Анорзор» маҳалласи ҳудудида, Бишкек — Душанбе — Термиз халқаро М-41 автомобиль йўлининг 1449-километрида жойлашган Обизаранг дарёси устидан ўтувчи кўприкка зарар етган.
Маълум қилинишича, мазкур кўприк 1977 йилда қурилган бўлиб, узунлиги 54,7 метрни ташкил этади. У Ўзбекистон ва Тожикистонни боғлаб турувчи муҳим транспорт иншоотларидан бири ҳисобланади. Кўприкдан ҳар соат ўртача 600–800 та транспорт воситаси ҳаракатланади.
Дастлабки хулосаларга кўра, иншоотнинг шикастланишига кучли ёғингарчилик туфайли дарёда сув сатҳи ва оқим тезлигининг кескин ошиши сабаб бўлган.
Фуқаролар ва транспорт воситалари хавфсизлигини таъминлаш мақсадида кўприк орқали ҳаракат вақтинча чекланган. Ҳозирда транспорт оқими Узун туманидаги «Дўстлик», «Янги йўл» ва «Қорашиқ» маҳаллалари орқали айланма йўналишга йўналтирилган.
Ҳодиса жойида Сурхондарё вилояти ва туман раҳбарияти, Автомобиль йўллари қўмитасининг вилоят бошқармаси вакиллари ҳамда соҳавий мутахассислар иш олиб бормоқда.
Айни пайтда кўприкнинг техник ҳолати ўрганилиб, етказилган зарар кўлами баҳоланмоқда ва транспорт қатновини тиклаш бўйича муҳандислик ечимлари ишлаб чиқилмоқда.
Комментарии