Шифокорлар, ҳарбий хизматчилар ва судьяларнинг иш ташлашларда иштирок этиши тақиқланади

Қонунчиликка киритилган ўзгартиришларга кўра, забастовкаларда қатнашиш тақиқланган шахслар тоифалари белгиланди.

Буларга қуйидагилар киради:

— тиббиёт ходимлари;
— Давлат фуқаролик хизмати лавозимларининг давлат реестрига киритилган ва давлат органларининг ваколатларини амалга оширувчи давлат фуқаролик хизмати лавозимларини эгаллаб турган шахслар;
— махсус (ҳарбий) унвонларга ёхуд мартаба даражаларига (малакавий, лавозим тоифаларига) эга бўлган ҳарбий хизматчилар, судьялар, шунингдек судлар ва ҳуқуқни муҳофаза қилувчи органлар ходимлари;
— энергия таъминоти ва сув таъминоти тизими ташкилотларининг ходимлари;
— алоқа тизими ходимлари.

Агар ушбу шахслар иш ташлашларда иштирок этсалар, улар ноқонуний деб топилади.

Агар иш ташлаш Меҳнат кодекси ва бошқа қонунларда назарда тутилган талабларни бузган ҳолда ўтказилса ёки уни ўтказиш тўғрисида қарор қабул қилинса, у ноқонуний деб топилади.

Шунингдек, фавқулодда ҳолат, фавқулодда вазиятлар, ҳарбий ҳолат ва умумий сафарбарлик шароитларида иш ташлашлар тақиқланади.