Тошкентда талаба амалиётчиларга шаҳвоний шилқимлик қилган шифокор қамоққа олинди

UzNews.uz мухбири суд қарорига таяниб хабар беришича, жиноят ишлари бўйича Олмазор туман судида 32 ёшли С.С.га нисбатан иш кўриб чиқилган.

Маълум бўлишича, С.С. ҳуқуқбузарлик содир этган вақтда Олмазор туманидаги «D-D» хусусий клиникасида уролог шифокор сифатида фаолият юритган. У клиникада амалиёт ўтаётган «Ал-Фраганус» университети талабаларига нисбатан ноўрин ҳаракатлар қилган.

Суд материалларига кўра, шифокор талабалардан бирига у билан жинсий алоқа қилишни таклиф қилган. Бошқа бир талабага эса унга уйланиш нияти борлигини билдириб, қолдирилган дарслари учун ижобий баҳолар қўйиб беришини айтган.

Суд жараёнида эркак айбини қисман тан олган. Унинг таъкидлашича, биринчи талаба унга нисбатан туҳмат қилган, иккинчи қизга эса ҳақиқатдан ҳам кўнгил қўйган.

Суд қарорига кўра, С.С. Маъмурий жавобгарлик тўғрисидаги кодекснинг 41-1-моддаси 1-қисмида (жинсий шилқимлик) назарда тутилган ҳуқуқбузарликни содир этган деб топилди ва унга нисбатан 5 сутка маъмурий қамоқ жазоси тайинланди.