Тошкент халқаро аэропортида йирик миқдордаги олтинни хорижга ноқонуний олиб чиқишга уринишнинг олди олинди. Бу ҳақда ДХХ хабар қилди.
Маълум қилинишича, ДХХ ва «Тошкент-Аэро» ихтисослаштирилган божхона комплекси томонидан ўтказилган қўшма тезкор тадбир давомида Тошкент — Дубай рейси йўловчиларидан бирининг юки батафсил текширилган.
Андижон вилоятида туғилган, Тошкент шаҳрида яшовчи 1980 йилда туғилган эркакнинг чемодани ичида олтин аниқланган. Олтин чемоданнинг ички конструкция қисмига пластина кўринишида яширилган бўлган.
Мусодара қилинган олтиннинг умумий оғирлиги 1 кг 923 граммни ташкил этган.
Текширув жараёнида ушбу ҳолатга Тошкент вилоятида туғилган, 1992 йилда туғилган фуқаро ҳам алоқадор экани маълум бўлган. У муқаддам Жиноят кодексининг 182-моддаси (Божхона тўғрисидаги қонунчиликни бузиш) билан судланган.
Ҳозирда ҳолат юзасидан терговга қадар текширув ҳаракатлари олиб борилмоқда.
Комментарии