Самарқанд вилоятида яшовчи фуқаро бошқа давлат ҳудудидаги қуролли можарода иштирок этганликда айбдор деб топилди, деб хабар бермоқда UzNews.uz мухбири суд ҳукмига таяниб.
Иш материалларига кўра, Жомбой туманида туғилган 22 ёшли йигит 2021 йил декабрь ойида Россияга ишлаш мақсадида кетган. Кейинчалик у наркотик моддаларнинг ноқонуний айланмаси билан боғлиқ жиноят учун ҳукм қилиниб, Челябинск вилоятидаги жазони ижро этиш муассасасида жазо ўтаган.
Сўнгра у Россия Мудофаа вазирлиги билан шартнома тузиб, қуролли кучлар сафига қўшилган. Донецкдаги полигонда ҳарбий тайёргарликдан ўтгач, жанг ҳаракатлари ҳудудига юборилган.
Авиаҳужумлардан бирида у жароҳат олиб, шундан сўнг Ўзбекистонга қайтган.
Судда айбланувчи ўз айбини тан олиб, пушаймонлигини билдирган. Суд уни Ўзбекистон Республикаси Жиноят кодексининг 154-моддаси 1-қисми (ёлланмачилик) бўйича айбдор деб топди.
Унга 5 йил муддатга озодликни чеклаш жазоси тайинланди.
Шунингдек, маҳкумга яшаш жойини рухсатсиз тарк этиш ва Самарқанд вилояти ҳудудидан ташқарига чиқиш тақиқланди.
Комментарии