Аму–Сурхон ҳавза ирригация тизимлари бошқармаси матбуот хизмати маълумотига кўра, Бойсун туманининг «Кофрун» маҳалласи орқали оқувчи Хангаронсойнинг чап қирғоғида аввал нефть сақлаш учун вақтинчалик резервуарлар жойлашган.
Ушбу резервуарлар жорий йил январь–февраль ойларида ERIELL Group компанияси томонидан ер дамбалари қуриш орқали ташкил этилган. Уларнинг мақсади бурғулаш жараёнида ер юзасига чиққан нефтьнинг сой ўзанига тушиб кетишининг олдини олиш бўлган. Тўпланган нефть махсус техника ёрдамида олиб чиқилган.
Маълум қилинишича, 23 апрель куни Бойсун туманида кучли ёғингарчилик оқибатида Хангаронсойда сув сатҳи кескин ошган ва сел оқимлари вақтинчалик дамбалардан ошиб ўтган. Натижада нефть аралаш сув Бандихонсойга, у орқали эса Қумқўрғон тумани ҳудудидан ўтувчи Сурхондарё дарёсига тушган.
Идора хабарига кўра, шу куниёқ ERIELL Group компанияси томонидан Хангаронсойдаги бир нечта дамбалар қайта тикланган ва нефтьнинг сувга чиқиб кетиши тўлиқ бартараф этилган.
Комментарии