Бирлашган Миллатлар Ташкилоти Тараққиёт дастури ва Ўзбекистон Фавқулодда вазиятлар вазирлиги мамлакатнинг етти минтақасидаги 272 та жойда масжидларнинг овоз кучайтиргичлари орқали фавқулодда вазиятлар ҳақида хабар бериш тизимини жорий этди, деб хабар берди БМТТД матбуот хизмати.
Ушбу ечим тахминан 6,5 миллион кишини, шу жумладан заиф гуруҳларни қамраб олиш ва масжидлардан алоқа ва энергия таъминоти узилганда ҳам ишончли алоқа канали сифатида фойдаланиш имконини беради.
Синов тариқасида махсус қурилмалар аҳоли пунктларига яқин жойлашган масжидларга ўрнатилмоқда. Бугунги кунга қадар Жиззах, Қашқадарё, Наманган, Самарқанд, Сирдарё, Тошкент ва Фарғона вилоятларидаги масжидларга қурилмалар ўрнатилди.
"Масжидларнинг танланиши бежиз эмас: улар анъанавий равишда маҳаллий жамоаларга сезиларли таъсир кўрсатадиган нуфузли ижтимоий институтлар сифатида қабул қилинади. Бундан ташқари, масжидлар деярли барча аҳоли пунктларида жойлашган бўлиб, 500 метрдан 2000 метргача эшитиш радиусини таъминлайдиган юқори қувватли ташқи радиокарнайлар билан жиҳозланган," дейилади хабарда.
Қайд этилишича, ушбу хабар бериш каналининг қўшимча афзаллиги шундаки, у мобил алоқа ва электр таъминотида узилишлар бўлган тақдирда ҳам фавқулодда хабарларни узатиш имкониятига эга.
Комментарии