"Ўзгидромет" хабарига кўра, Ўзбекистон ҳудудига совуқ антициклон таъсири 5 декабрга қадар сақланиб туради.
"29 ноябрдан совуқ антициклон таъсири кучайиб, атмосфера босими кўтарилади ва ҳаво ҳарорати пасаяди. Кечалари совуқ, кундуз кунлари эса ҳаво бироз исийди. Тинч совуқ антициклон даврларига хос бўлган эрталабки туман тушиши мумкин," - дейилади хабарда.
Яқин 10 кун ичида юқори босим соҳаси сақланиб қолиши тахмин қилинмоқда.
Эслатиб ўтамиз, аввалроқ мутахассислар ҳаво сифати 24 ноябрь куни яхшиланишини тахмин қилган эди. Бироқ янгиланган прогнозда инверсия жараёнлари 29 ноябргача давом этиши маълум қилинган.
Синоптик таҳлиллар шуни тасдиқлайдики, турғун антициклон шароитида инверсия шароитлари режалаштирилган муддатдан узоқроқ давом этади.
Узоқ муддатли инверсия шароитида чанг, тутун ва майда муаллақ заррачалар (PM) концентрациясининг ошиши, шунингдек, қуюқ туманлар пайдо бўлиши мумкин.
Комментарии