Рақобатни ривожлантириш ва истеъмолчилар ҳуқуқларини ҳимоя қилиш қўмитаси кўчмас мулк савдоси тўғрисидаги эълонларда нархларни миллий валютада кўрсатиш талабини бузган ахборот ресурсларига нисбатан чора кўрди.
Қайд этилишича, сўнгги вақтларда ижтимоий тармоқларда товарлар, ишлар ва хизматлар нархи хорижий валютада кўрсатилган реклама эълонларини жойлаштириш ҳолатлари кўпайиб бормоқда.
Хусусан, Uyjoylar.uz, Buxoro Agentstva_Nest, Qashqadaryo uylari N1, Sirdaryo Uy Bozor, Namangan Uylari, Навоий уйлари | Navoiy uy bozor, Uy Bozorim, Hilolbozor.uz ва Gulistonliklar Uy-Joy Telegram-каналларида кўчмас мулк объектларининг қиймати хорижий валютада кўрсатилган рекламалар жойлаштирилган.
"Реклама тўғрисида"ги Қонуннинг 16-моддасига кўра, реклама эълонларида нархларни (тарифларни) чет эл валютасида кўрсатиш тақиқланади.
Бундан ташқари, "Валютани тартибга солиш тўғрисида"ги Қонуннинг 9-моддасига мувофиқ, Ўзбекистон ҳудудида товарлар, ишлар ва хизматлар учун барча ҳисоб-китоблар ва тўловлар миллий валютада амалга оширилади. Мамлакат ҳудудида сотиладиган товарлар, ишлар ва хизматлар нархини чет эл валюталарига ёки шартли бирликларга боғлашга йўл қўйилмайди.
Қўмита юқорида санаб ўтилган Telegram каналлари маъмурлари билан реклама тўғрисидаги қонунчилик талаблари юзасидан тегишли ҳуқуқий тушунтириш ишларини олиб борди. Мазкур каналларда жойлаштирилган реклама материаллари талабга мувофиқлаштирилди.
Комментарии