2026 йил 1 январдан товарлар (ишлар, хизматлар) электрон савдоси билан шуғулланувчи субъектлар учун фойда солиғи ставкаси 15% этиб белгиланади. Бу ҳақда Иқтисодий ва молия вазирлигининг 2026–2028 йилларга мўлжалланган бюджетномасида маълум қилинган.
Ҳозирги вақтда ушбу ставка 10% ни ташкил қилади. Охирги марта у жорий йил январь ойида 7,5% дан 10% гача оширилган эди. Айланма солиқ ставкаси ҳам амалдаги 3% дан 4% гача кўтарилади.
Бундан ташқари, қишлоқ хўжалиги маҳсулотлари ишлаб чиқарувчилари учун 2026 йил 1 январдан улар томонидан етиштирилган маҳсулотни реализация қилишда ҚҚС нол ставкаси жорий этилади.
2026 йил 1 январдан ўз эҳтиёжлари учун гипс хомашёсини қазиб оладиган ва ундан қурилиш материаллари ишлаб чиқарадиган корхоналар учун ер ости бойликларидан фойдаланиш учун солиқ ставкаси 50% этиб белгиланади.
Келгуси йилдан иссиқхона хўжаликлари учун қуйидагилар таклиф этилмоқда:
• 2029 йил 1 январигача ижтимоий солиқнинг 1% ставкаси, агар иссиқхона фаолиятидан олинадиган даромад корхонанинг йиллик умумий даромадининг камида 60% ни ташкил қилса;
• Ер участкалари қайси тоифага киришидан қатъи назар, қишлоқ хўжалиги ерлари учун белгиланган ставкалар бўйича ер солиғини ҳисоблаш.
Комментарии