Фарғонада қарийб 1,5 млрд сўмлик қимматбаҳо буюмларнинг ноқонуний олиб кирилиши олди олинди

Фарғона вилояти божхона бошқармаси ўз хавфсизлиги хизмати ходимлари Давлат божхона қўмитаси Контрабандага қарши курашиш бўлими ходимлари билан ҳамкорликда Олтиариқ туманида хориждан ноқонуний равишда заргарлик буюмлари олиб кирилишининг олдини олди.

Тадбир давомида аввал кузатувга олинган Damas автомашинаси тўхтатилиб, кўздан кечирилганда автомобиль салонидаги барда йўловчига тегишли бўлган хорижда ишлаб чиқарилган заргарлик буюмлари борлиги аниқланган. Заргарлик буюмлари 3 та ўрамга жойланган бўлиб, божхона назоратидан ўтганлигини тасдиқловчи ҳужжатлари бўлмаган.

Аниқланишича, топилган заргарлик буюмлари 5 хил турдаги 127 та буюмдан иборат бўлиб, уларнинг умумий оғирлиги 1 кг 332 г, дастлабки баҳоси 1 млрд 440 млн сўмни ташкил этади.

Ҳозирда мазкур ҳолат юзасидан божхона текширувлари ўтказилмоқда.