2026 йил 1 мартдан бошлаб атроф-муҳитга таъсири бўйича I ва II тоифадаги саноат корхоналари ўз ҳудудида фон мониторинг станцияларини ўрнатиши мажбурий бўлади, дейилади президент қарорида.
Шунингдек, станцияларни Экология қўмитасининг Миллий экологик мониторинг маркази билан интеграция қилиш керак.
Фон мониторинги станцияларини ўрнатмаган ва уларни Миллий марказга уламаган корхоналарга компенсация тўловлари 5 бараварга оширилади.
Шунингдек, 2026 йил 1 мартдан бошлаб табиатга етказилган зарар учун компенсация тўловларидан озод қилиш тарзидаги имтиёзларни тақдим этиш билан боғлиқ барча қонунчилик ҳужжатлари ва юридик кучга эга бўлган кўрсатмалар ўз кучини йўқотади.
Эслатиб ўтамиз, I тоифага атроф-муҳитга таъсир кўрсатиш хавфи юқори бўлган корхоналар - автомагистраллар, аэропортлар, нефть базалари, қора ва рангли металлургия заводлари, тамаки маҳсулотлари, цемент ишлаб чиқариш корхоналари, фармацевтика заводлари, фабрикалар ва бошқалар киради.
II тоифага атроф-муҳитга таъсир кўрсатиш хавфи ўртача бўлган корхоналар - алкоголли ичимликлар, қоғоз ва картон ишлаб чиқариш ва қуйиш корхоналари, паррандачилик фабрикалари, пахтани қайта ишлаш корхоналари ва бошқалар киради.
Комментарии