Бугун, 3 ноябрь куни Тошкентда Gentra ҳайдовчиси ЙПХ ходимини Gentra автомашинаси капотида сайр қилдиргани ҳақида хабар берган эдик. Ушбу ҳолат юзасидан ИИВ ЙҲХХ Матбуот хизмати изоҳ берди.
Маълум бўлишича, ушбу воқеа кеча, 2 ноябрь куни пойтахтнинг Яшнобод тумани Фарғона йўли кўчасида содир бўлган.
Қайд этилишича, инспектор ҳайдовчига тўхташ ишорасини берган, бироқ ҳайдовчи бунга эътибор бермай, ҳаракатни давом эттирган. Ходим машина ортидан борган ва унга етиб олиб, ҳужжатларини беришини талаб қилган. Шу пайт ҳайдовчи газни босиб, инспекторни устига автомашинани ҳайдаган ва ходим Gentra капотида осилган ҳолда бир неча ўн метр йўл юрган.
Қоидабузарни тўхтатишга бошқа ҳайдовчилар ёрдам беришган.
ЙҲХББ инспектор Отабек Маҳмудов жабрланмагани, бироқ воқеа содир бўлган вақтда унинг ҳаёти хавф остида бўлганини таъкидлади.
Кейинроқ қўлга олинган шахс 24 ёшли эркак экани маълум бўлди. Текширув шуни кўрсатдики, ушбу машинада 144 та қоидабузарлик қайд этилган, улардан 38 таси тўлов муддати ўтган. Яна 30 та жарима ижро хизматига ўтказилиб, улар бўйича жами қарздорлик 18 млн 90 минг сўмга етган.
Шу куннинг ўзида ҳайдовчи қўлга олинган. Мазкур ҳолат юзасидан Яшнобод тумани прокуратураси томонидан ЖКнинг 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган.
Суд қарорига кўра, айбланувчи жарима, мажбурий ёки ахлоқ тузатиш ишлари ёхуд уч йилгача озодликдан чеклаш ёки озодликдан маҳрум қилиш билан жазоланиши мумкин.
Комментарии