Сенатнинг ўн биринчи ялпи мажлисида "Сунъий интеллектни қўллаш билан юзага келадиган муносабатлар тартибга солиниши муносабати билан Ўзбекистон Республикасининг айрим қонун ҳужжатларига қўшимча ва ўзгартишлар киритиш тўғрисида"ги Қонун кўриб чиқилди ва маъқулланди.
Йиғилишда сўнгги йилларда мамлакатда сунъий интеллект технологияларидан фойдаланишнинг барқарор ўсиши, шунингдек, ушбу соҳадаги лойиҳаларни молиялаштириш ҳажмининг кенгайиши кузатилгани таъкидланди.
Қабул қилинган қонун бир қатор меъёрий ҳужжатларга, шу жумладан "Ахборотлаштириш тўғрисида"ги қонунга ўзгартиришлар киритади. Ҳужжатларда илк бор "сунъий интеллект" атамасининг расмий таърифи мустаҳкамланмоқда, давлат сиёсатининг асосий йўналишлари, шунингдек, ваколатли органнинг ушбу соҳадаги ваколатлари белгиланмоқда. Ахборот ресурсларини яратишда ва ахборот тизимларининг ишлашида сунъий интеллектни қўллашнинг умумий қоидалари, шунингдек, шахсга доир маълумотлар ҳимоясини таъминлаш бўйича нормалар белгиланмоқда.
Аввалроқ шахсга доир маълумотларни сунъий интеллект ёрдамида қонунга хилоф равишда қайта ишловчи ёки тарқатувчи фуқаролар ва ташкилотлар маъмурий жавобгарликка тортилиши ҳақида хабар берилганди. Хусусан, БҲМнинг 50 бараваридан 100 бараваригача жарима ва 15 суткагача маъмурий қамоқ, ҳуқуқбузарлик содир этишда фойдаланилган техник воситаларни мусодара қилиш назарда тутилган.
Янгилик сунъий интеллект ёрдамида яратилган ахборот ресурсларини мажбурий маркировкалашни жорий этишни назарда тутади. Белгиланишича, бундай ресурслар ва тизимлар инсон ҳуқуқлари, унинг ҳаёти, соғлиғи, эркинлиги, шаъни, қадр-қиммати ва бошқа дахлсиз ҳуқуқларини бузмаслиги керак.
Шунингдек, фуқароларнинг ҳуқуқ ва эркинликларига дахл қилувчи қарорларни қабул қилишда сунъий интеллектга асосланган алгоритм ва тизимларнинг хулосаларига таяниш мумкин эмаслиги мустаҳкамлаб қўйилди.
Сенаторларнинг фикрича, янги нормалар сунъий интеллект технологияларини хавфсиз ривожлантириш учун ҳуқуқий асос яратади, маълумотларни ҳимоя қилиш даражасини оширади ва жамиятнинг рақамли хизматларга бўлган ишончини мустаҳкамлайди.
Қонун Сенат томонидан маъқулланди.
Комментарии