Осиё Тараққиёт Банки Ўзбекистонни ўрта мактабларда фан, технология, муҳандислик ва математика (STEM) йўналишидаги таълим сифатини оширишни қўллаб-қувватлаш учун 100 миллион АҚШ доллари миқдорида имтиёзли кредитни тасдиқлади, деб хабар бормоқда UzNews.uz АДБнинг Ўзбекистондаги Доимий вакилилик ахборотига таяниб.
“Ўрта таълимда фан, технология, муҳандислик ва математика” лойиҳаси Ўзбекистон ёшлари замонавий инновацион кўникмаларни эгаллашини таъминлашга қаратилган бўлиб, бу барқарор ва инклюзив (ҳаммани қамраб олувчи) ўсишни таъминлашга хизмат қилади. Бу орқали мамлакат 2030-йилга бориб юқори даромадли давлатлар қаторига кириш мақсадига эришмоқчи.
“Мазкур лойиҳа Ўзбекистоннинг инсон капиталiga сармоя киритиш ва ёшларга кенг имкониятлар яратишга бўлган қатъий интилишини акс эттиради. STEM-таълимни мустаҳкамлаш орқали Ўзбекистон глобал даражада рақобатбардош, барқарор ва инклюзив келажак пойдеворини қўймоқда,” — деди АДБнинг Ўзбекистондаги доимий вакилилик раҳбари Канокпан Лао-Арайя.
Лойиҳа доирасида Ўзбекистон бўйлаб 200 та ўрта мактабда таълим шароитлари замонавийлаштирилади. Бу мактаблар яқин атрофдаги бошқа мактаблар учун ресурс марказлари сифатида фаолият юритади. Модернизация қуйидагиларни ўз ичига олади:
• замонавий лабораториялар,
• ахборот-коммуникация технологиялари (АКТ) инфратузилмаси,
• қуёш энергияси тизимлари,
• ногиронлиги бўлган ўқувчилар учун инклюзив таълим муҳитлари.
Шунингдек, бутун мамлакат бўйлаб STEM йўналишидаги олти фан бўйича ўқитувчиларни тайёрлаш амалга оширилади. Фанлараро таълимни рағбатлантириш ва таълим технологияларидан фойдаланиш йўлга қўйилади.
Бундан ташқари, лойиҳа:
• STEM соҳаси бўйича касбий йўналтиришга оид тарғибот кампаниялари,
• ва қизларни STEM соҳасига жалб қилиш учун индивидуал маслаҳат бериш ташаббусларини ҳам ўз ичига олади.
Комментарии