Бугун, 21 октябрь куни, президент раҳбарлигида ҳудудлар ва соҳаларда сунъий интеллект технологияларини ривожлантириш масалаларига бағишланган видеоселектор йиғилиши бўлиб ўтмоқда.
Ўзбек тилига давлат тили мақоми берилганининг 36 йиллиги муносабати билан давлат раҳбари халқни табриклаб, сунъий интеллект дастурларининг самарали ишлаши ўзбек тилини чуқур англамасдан мумкин эмаслигини таъкидлади.
«Бир нарсани билинг — сунъий интеллект дастурлари самарали ишлаши учун, аввало, улар ўзбек тилини мукаммал даражада тушуниши керак», — деди давлат раҳбари.
Шу билан бирга, ўзбек тилидаги кўплаб материаллар — адабиётлар, маълумотлар, мақолалар, ҳисоботлар ва илмий ишлар — ҳалигача рақамлаштирилмагани таъкидланди. Ҳатто электрон форматга ўтказилганлари ҳам турли манбаларда сақланмоқда ва тизимли ҳолда жамланмаган.
Шу муносабат билан Вазирлар Маҳкамасига барча вазирлик ва идоралар маълумотларини электрон форматга ўтказиш бўйича графикни тасдиқлаш вазифаси юклатилди. Рақамли технологиялар вазирлигига эса сунъий интеллект миллий маданият ва қадриятларни акс эттира олиши учун Ўзбек тили корпусини яратиш топширилди.
Бундан ташқари, 2026 йил якунига қадар рақамли маълумотлар мажмуасини бир жойда жамлаб, уларни қайта ишлаш, таҳлил қилиш ва фойдаланиш имконини берувчи Data Lake платформаси ишга туширилиши кутилмоқда.
Комментарии