Жорий йилнинг 9 ойида Ўзбекистонда 15-17 ёшдаги 155 нафар қиз балоғат ёшига етмасдан турмушга узатилди. Бу ҳақда Соғлиқни сақлаш вазири Асилбек Худаяров "Ўзбекистон 24"га берган интервьюсида маълум қилди.
Президент раислигида ўтказилган селектор йиғилишида муҳокама қилинган эрта никоҳлар билан бир қаторда яна бир хавотирли факт - қариндошлар ўртасидаги никоҳларнинг сақланиб қолаётганидир.
"Замонавий тиббиёт шуни исботладики, эрта никоҳлар ҳам, яқин қариндошлар ўртасидаги никоҳлар ҳам туғма касалликлар ва ногирон болалар туғилиш хавфини сезиларли даражада оширади," - деди Асилбек Худаяров.
Учинчи муаммо - туғруқ оралиғидаги зарур тиббий интервалга риоя қилмасдан, бир календарь йилида икки марта ҳомиладор бўлиш ҳолатлари. Улар кўпинча оналар соғлиғининг ёмонлашувига ва нимжон болалар туғилишига олиб келади.
Вазирнинг сўзларига кўра, президент бундай ҳолатларнинг олдини олиш ва соғлом авлод туғилишини таъминлаш учун жойларда ишларни кучайтириш бўйича топшириқ берган.
Шунингдек, аҳоли ўртасида кенг ва самарали тарғибот-ташвиқот ишлари олиб борилади.
"Бу каби қонунбузилиш ҳолатлари такрорланган тақдирда, улар маҳалла даражасида муҳокама қилиниб, бартараф этиш чоралари кўрилади," - деди вазир.
Комментарии